介紹大家做一個炸薯仔嘅食譜！就咁炸？太普通啦......菲師奶今次用粟米蓉包入薯蓉中間，沾上麵包糠炸至外層金黃香脆。 一切開，嘩！啲粟米蓉湧出嚟㗎！食嘅時候要留心，因為佢真係流心㗎！
今次選用嘅係「美國紫皮馬鈴薯」！咪睇佢細細粒粒，佢好香甜架，用來做薯蓉啱晒！只要放入滾水中烚約10分鐘，若果牙籤可以輕易刺入薯仔中，就表示薯仔已經ready做薯蓉喇。記得要趁熱剝皮呀！凍左會冇咁易剝㗎！ 美國馬鈴薯營養簡介: 一個中等大小的馬鈴薯只含110千卡熱量，仲少過一碗白飯，而且蘊含一天所需的45%維他命C、10%維他命B6及 620毫克鉀，又不含脂肪，有利於心臟健康和體重管理。
【脆炸流心粟米美國紫薯餅】食譜 可製作 6件
材料：
美國紫皮馬鈴薯 1包（約400g）
忌廉粟米 250g
番茜葉 適量
鹽 1/8茶匙
黑椒碎 少少
粟粉 3湯匙
雞蛋 1隻
麵包糠 50g
1）番茜葉洗淨，抹乾水份切碎後與粟米湯混合，倒入製冰格中，放冰箱雪硬。
2）薯仔洗淨，放入滾水中烚10-15分鐘至腍身，去皮後放入大碗中，加入鹽及黑椒碎，壓成薯蓉，平均分成6份，放涼。
3）取出已雪硬的粟米蓉，包入薯蓉中，然後順序沾上：粟粉 —> 蛋液 —> 麵包糠
4）放入熱油中炸至金黃色便可。
